དེ་རིང་ཕྱི་ལོ་ ༢༠༢༦ ཟླ་ ༤ ཚེས་ ༡༣ ཉིན་གྱི་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་ཨ་ཀྱཱ་རིན་པོ་ཆེ་བློ་བཟང་ཐུབ་བསྟན་མཆོག་དང་།  ཚ་ཁོ་དཔོན་པོ་ངག་དབང་གྲགས་པའི་སྐུ་ཐོག་བཞི་པ་བློ་བཟང་བྱང་ཆུབ་འོད་ཟེར་མཆོག  དེ་བཞིན་རྒྱ་གར་གྱི་ཚོང་དཔོན་ཆེན་པོ་ Jay Mehta ལགས་སོགས་མང་ཚོགས་ ༤༠༠ ཙམ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་བཅར་ཞུས་འདུག  མང་མཇལ་ཁྲོད་༸གང་ཉིད་མཆོག་གིས་གཙོ་བོ་རྟེན་ཅིང་འབྲེལ་བ་འབྱུང་བའི་སྐོར་བསམ་བློ་ཡག་པོ་གཏང་དགོས་གལ་དང་།  རྒྱ་ཆེ་ས་ནས་བསམ་བློ་བཏང་ན་འཛམ་བུ་གླིང་འདིའི་སྒང་གི་མི་རྙོག་དྲ་བཟོ་མཁན་ཚོར་བཟོད་བསྲན་དང་རྒྱ་ཆུང་ས་ནས་སོ་སོའི་ནང་ཙག་ཁྲོད་རྙོག་དྲ་བཟོ་མཁན་ཚོར་ཡང་བཟོད་བསྲན་གནང་དགོས་གལ་ཡིན་པའི་བཀའ་སློབ་བཀའ་དྲིན་སྩལ་འདུག དེ་ཡང་མཇལ་ཁ་གྲུབ་མཚམས་འདི་གའི་གསར་འགོད་པའི་དྲི་བར་ལན་འདེབས་ཁྲོད།  ཨ་ཀྱཱ་རིན་པོ་ཆེ་མཆོག་གིས་༸མགོན་པོ་མཆོག་དགུང་ལོ་བགྲེས་པོ་ཕེབས་བཞིན་ཡོད་པ་མཇལ་དུས་ཐུགས་ལ་དགའ་སྐྱོ་གཉིས་ཀ་ཡོང་གི་འདུག་ཅེས་ཚོར་ཤུགས་ཆེན་པོའི་གསུངས་སོང་ལ།  མཇལ་ཞུ་སྐབས་༸གང་ཉིད་མཆོག་གིས་རྒྱ་གར་དུ་ནང་པའི་རྗེས་འབྲངས་པ་དང་གཞན་ཆོས་ལུགས་ཀྱི་རྗེས་འབྲངས་པ་ཚང་མས་༸གང་ཉིད་མཆོག་ལ་ཧ་ཅང་གི་དགའ་པོ་གནང་གི་འདུག་ལ་མཇལ་བཅར་ཡང་མུ་མཐུད་ཞུ་ཡི་འདུག་ཅེས།  ༸གོང་ས་མཆོག་ནས་ཀྱང་དུས་རྟག་ཏུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་གྱི་ཡོད་པ་བཀའ་སྩལ་བྱུང་བ་འགྲེལ་བརྗོད་དང་འབྲེལ །  དེ་ནི་ང་ཚོ་ཚང་མར་བཀའ་སློབ་གཙོ་བོ་གཅིག་ཆགས་ཡོད་པ་གསུངས་ཏེ།  ༸གང་ཉིད་མཆོག་གིས་དགུང་ལོ་བརྒྱ་དང་གསུམ་བཅུ་ཙམ་སྐུ་འཚོ་བཞུགས་མཛད་ཀྱི་ཡིན་ཞེས་བཀའ་སློབ་རིམ་པ་ཕེབས་ཡོད་པ་ཡིན་ནའང་།  དུས་ཚོད་ནི་ཁྱུག་ཙམ་ལ་རྫོགས་འགྲོ་ངེས་ཡིན་དུས།  ང་ཚོའི་ཚང་མས་རང་མི་རིགས་ཀྱི་རིག་གཞུང་དང་ཆོས་ལུགས་འཛིན་སྐྱོང་གི་འགན་འཁུར་དགོས་པ་དང་།  ལྷག་པར་དུ་བྱེས་ལ་བོད་མི་ཉུང་ངུ་ལས་མེད་པས་ཕན་ཚུན་མཐུན་སྒྲིལ་གནང་དགོས་གལ་ཡིན་པ་གསུངས་སོང་།  རིན་པོ་ཆེ་མཆོག་གིས་ད་དུང་གཙོ་བོ་དེ་རིང་མཇལ་བཅར་ཁྲོད།  ཁོང་སྐུ་ཉིད་བོད་ལ་ཡོད་དུས་སྐབས་ཀྱི་གནས་ཚུལ་དང་།  བོད་ནས་བྲོས་བྱོལ་ལ་ཕེབས་དགོས་བྱུང་བའི་སྐོར།  ལྷག་པར་དུ་༸པཎ་ཆེན་རིན་པོ་ཆེའི་ཡང་སྲིད་སྐོར་གྱི་གནས་ཚུལ་སོགས་ལོ་རྒྱུས་དང་འབྲེལ་བའི་ཕྱིར་དྲན་ཞེས་པའི་ཕྱག་དེབ་གཉིས་བརྩམས་ཡོད་པ་དེ་༸གང་ཉིད་མཆོག་ལ་ཕུལ་རྒྱུ་བྱུང་ཡོད་པ་བཅས་གསུངས་སོང་།  དེ་བཞིན་ཚ་ཁོ་དཔོན་པོ་ངག་དབང་གྲགས་པའི་སྐུ་ཐོག་བཞི་པ་བློ་བཟང་བྱང་ཆུབ་འོད་ཟེར་མཆོག་གིས་འདི་གའི་གསར་འགོད་པར།  དེ་རིང་མཇལ་བཅར་ཞུས་དགོས་དོན་གཙོ་བོ་ནི།  འདི་ལོ་༸སྐུའི་གོ་སྟོན་དང་བྱམས་བརྩེའི་ལོ་སྲུང་བརྩི་དང་བསྟུན་ནས་༸གང་ཉིད་མཆོག་སྐུ་ཚེ་ཡུན་དུ་བརྟན་པ་དང་།  བོད་ལ་མྱུར་དུ་བྱོན་ཐུབ་པའི་སྨོན་འདུན་དང་སྦྲགས།  ༸མགོན་པོ་མཆོག་ལ་ཚ་ཁོ་ངག་དབང་གྲགས་པའི་སྐུ་བརྙན་ཞིག་ཕུལ་རྒྱུ་དེ་ཡིན་སྐོར་དང་འབྲེལ།  ༸གོང་ས་མཆོག་ནས་ཀྱང་དམིགས་བསལ་གྱི་ལམ་གཙོ་རྣམ་གསུམ་གྱི་ལུང་སྩལ་གནང་ཡོད་པ་དང་།  ཁོང་ལ་རྟེན་འབྲེལ་སྐོར་བསམ་བློ་ཡག་པོ་གཏང་དགོས་པའི་བཀའ་སློབ་སྩལ་གནང་ཡོད་པ་གསུངས་སོང་།  མ་ཟད།  དེ་རིང་མཇལ་བཅར་ཞུས་མཁན་ཁོངས་སུ་རྒྱ་གར་གྱི་ཚོང་དཔོན་ཆེན་པོ་ Jay Mehta ལགས་རྒྱ་གར་གྱི་གློག་བརྙན་འཁྲབ་སྟོན་པ་གྲགས་ཅན་ Juhi Chawla ཡི་སྐུ་ཟླ་ཡང་ཡིན་པ་ཁོང་གིས་གསུང་དོན་བྱས་ན།  དེ་རིང་༸གོང་ས་མཆོག་མཇལ་བ་དེ་ཐེངས་བཞི་པ་ཡིན་པ་འགྲེལ་བརྗོད་ཀྱིས།  དེ་སྔ་༸གང་ཉིད་མཆོག་རྒྱ་གར་གྱི་མངའ་སྡེ་ Gujarat ནང་ཁོང་གི་ཆེད་འཛུགས་གནང་བའི་སློབ་གྲྭར་ཆིབས་སྒྱུར་བསྐྱངས་སྐབས་དེར་ཁོང་ནས་ཐེངས་དང་པོ་མཇལ་ཡོད་སྐོར་དང་འབྲེལ།  ༸གོང་ས་མཆོག་ནི་ཞི་བདེ་འི་རང་གཟུགས་ཤིག་དང་།  འགྲོ་བ་མི་ཕན་ཚུན་གཅིག་མཚུངས་ཡིན་པ་ནན་བརྗོད་མཛད་མཁན་ཞིག་ཡིན་དུས། དམིགས་བསལ་གྱིས་སྙིགས་མའི་དུས་འདིར་༸མགོན་པོ་མཆོག་གི་བཀའ་སློབ་ལམ་སྟོན་དེ་དག་ནི་སྔར་ལྷག་དགོས་ངེས་ཅན་ཞིག་ཡིན་པ་གསུངས་སོང་།  རྩ་བའི་དེང་སང་བཞུགས་སྒར་དུ་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་བརྩེ་བ་ཆེན་པོས་རེས་གཟའ་ཉི་མ་ཕུད་པའི་གཞན་ཉིན་མ་རྟག་པར་འཛམ་གླིང་ཡུལ་གྲུ་འདྲ་མིན་གྱི་དད་ལྡན་མི་སྣ་བརྒྱ་ཕྲག་འགའ་ཤས་ལ་མང་མཇལ་སྩལ་གནང་གི་ཡོད་པ་དང་།  མཇལ་བཅར་ཞུས་མཁན་ཁོངས་སུ་ཡུལ་ལུང་སོ་སོའི་གཞུང་འབྲེལ་དཔོན་རིགས་ཙམ་མ་ཟད།  ཆེས་མཐོའི་མི་སྣ་དང་། […]

The post བཞུགས་སྒར་དུ་གནད་ཡོད་མི་སྣ་ཁག་གཅིག་ནས་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་བཅར་ཞུས་པ། appeared first on vot.