ཁ་སང་ཨིན་ཡུལ་གཞུང་གིས་ཡུལ་དེའི་མང་ཚོགས་དང་གྲོས་ཚོགས་འཐུས་མི་མང་དག་ཅིག་གི་ངོ་རྒོལ་ལ་ལྟོས་མེད་རྒྱལ་ས་ London ལོན་ཌོན་ནང་ཡོ་རོབ་ནང་གི་རྒྱ་ནག་གི་གཞུང་ཚབ་ཁང་ཆེ་ཤོས་དེ་གསར་རྒྱག་བྱ་རྒྱུའི་ལས་འཆར་ལ་བཀའ་ཁྲོལ་གནང་བ་ལྟར། དེར་ས་གནས་བོད་མིས་གཙོས་པའི་མང་ཚོགས་ནས་ངོ་རྒོལ་ཀྱི་རྣམ་པ་ཤུགས་ཆེ་སྟོན་བཞིན་འདུག དེ་ཡང་ཨིན་ཡུལ་གྱི་སྲིད་བློན་ Keir Starmer མཆོག་རིང་མིན་རྒྱ་ནག་ཏུ་གཞུང་དོན་འཚམས་གཟིགས་ལ་ཕེབས་འཆར་དང་བསྟུན། ཁ་སང་ཨིན་ཡུལ་གཞུང་གིས་ ༢༠༡༨ ནས་བཀག་འགོག་བྱས་པའི་རྒྱ་ནག་གཞུང་ཚབ་ཁང་གསར་རྒྱག་གི་ལས་འཆར་ལ་མཐའ་མའི་ཆོག་མཆན་གནང་མ་ཐག གཞུང་ཚབ་ཁང་རྒྱག་ཡུལ་ Royal Mint Court  གྱི་ས་གནས་མང་ཚོགས་ནས་གནད་དོན་དེ་ཁྲིམས་ལ་གཏུགས་རྗེས་ཨིན་ཡུལ་གཞུང་གི་ཁྲིམས་ཀྱི་སློབ་སྟོན་པ་ཟུར་པ་ Charles Banner ཅཱལ་སི་བེ་ནཱར་ལགས་གླ་གཡར་བྱ་རྒྱུའི་གྲ་སྒྲིག་གནང་བཞིན་པ་དང་། དེར་ཨིན་ཡུལ་གཞུང་འཛིན་ངལ་སྩོལ་ཚོགས་པའི་གྲོས་ཚོགས་འཐུས་མི་ཁག་གཅིག་གིས་ཀྱང་རྒྱབ་སྐྱོར་ཞུ་རྒྱུ་ཁས་ལེན་གནང་བ་མ་ཟད། ཨིན་ཡུལ་བོད་དོན་རྒྱབ་སྐྱོར་བས་གཙོས་པའི་ཡུ་གུར་བ་དང་། ཧོང་ཀོང་མང་གཙོ་དོན་གཉེར་བ་སོགས་ཀྱིས་ཆོག་མཆན་དེར་ཐ་གཅིག་ཏུ་ངོ་རྒོལ་གནང་བཞིན་འདུག དེའི་ཁྲོད་ཨིན་ཡུལ་རྒྱལ་ས་ལོན་ཌོན་གྱི་ས་གནས་བོད་རང་བཙན་སློབ་ཕྲུག་ཚོགས་པའི་ཚོགས་མི་མཁའ་འགྲོ་ནོར་བུ་ལགས་ཀྱིས་ X སྤྱི་ཚོགས་དྲ་རྒྱའི་ནང་། རྒྱ་ནག་གིས་བོད་བཙན་བཟུང་བྱས་པའི་རྗེས་སུ་ཁོང་གི་ཕ་མ་གཉིས་ཨིན་ཡུལ་དུ་སྐྱབས་བཅོལ་ཞུས་ཡོད་པ་འགྲེལ་བརྗོད་དང་འབྲེལ། དེ་རིང་ཨིན་གཞུང་གིས་རྒྱ་ནག་གཞུང་ཚབ་གསར་རྒྱག་གི་ལས་འཆར་ལ་བཀའ་ཁྲོལ་སྤྲད་པ་དེས་རྒྱ་ནག་གཞུང་གིས་ད་བར་ཁྲིམས་འགལ་གྱི་བྱ་སྤྱོད་སྤེལ་བ་དེ་དག་ལ་རྒྱབ་སྐྱོར་བྱས་པ་ལྟ་བུར་གྱུར་ཡོད་ཅིང་། ང་ལྟ་བུ་མང་གཙོ་དོན་གཉེར་བ་སོགས་ཀྱི་བདེ་འཇགས་ལའང་ཉེན་ཁ་བཟོས་ཡོད་པ་རེད་ཅེས་བརྗོད་འདུག ཕྱོགས་མཚུངས་ཨིན་ཡུལ་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱི་དྲུང་ཆེ་བསྟན་འཛིན་ཀུན་དགའ་ལགས་ཀྱིས་འདི་ག་གསར་འགོད་པར་ལོ་ཤས་ནས་བཟུང་ཨིན་ཡུལ་གྱི་རྒྱལ་ས་ལོན་ཌོན་དུ་རྒྱ་ནག་གཞུང་ཚབ་གསར་རྒྱག་གི་ལས་འཆར་དང་འབྲེལ་བའི་གླེང་སློང་ཆེན་པོ་བྱུང་ཡོད་ཀྱང་། ཁ་སང་ཨིན་གཞུང་གིས་གཞི་རྒྱ་ཆེ་བའི་རྒྱ་ནག་གཞུང་ཚབ་གསར་རྒྱག་གི་ལས་འཆར་ལ་ཆོག་མཆན་སྤྲད་པར་ཨིན་ཡུལ་བོད་ཀྱི་སྐུ་ཚབ་དོན་ཁང་ནས་བློ་ཕམ་ཆེན་པོ་བྱུང་ཡོད་པ་མ་ཟད། རྒྱ་ནག་གཞུང་ཚབ་ཁང་གི་བརྒྱུད་རྒྱལ་མཚམས་ལས་བརྒལ་བའི་གཉའ་གནོན་དང་བོད་རིགས་གཙོས་པའི་ཡུ་གུར་བ་དང་། ཧོང་ཀོང་མང་གཙོ་དོན་གཉེར་བ་སོགས་ལ་སོ་ལྟ་དང་བདེ་འཇགས་ཀྱི་ཉེན་ཁ་ཆེ་རུ་འགྲོ་ཉེན་ཡོད་པ་གསུངས་སོང་། དེ་བཞིན་ཨིན་ཡུལ་གྱི་གྲོས་ཚོགས་འཐུས་མི་དང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ Chris Law ཁི་རིས་ལོ་ལགས་ཀྱིས་ Politicshome དྲ་ཚིགས་ཐོག་དཔྱད་གཏམ་ཞིག་འདོན་སྤེལ་གནང་བའི་ནང་། ཨིན་ཡུལ་གཞུང་གི་ཐག་གཅོད་དེས་གཞུང་གི་འཐུས་ཤོར་ཙམ་མ་ཡིན་པར། རྒྱལ་ཁབ་ཀྱི་བདེ་འཇགས་དང་འགྲོ་བ་མིའི་ཐོབ་ཐང་ལས་ཕྱི་འབྲེལ་གལ་ཆེ་བ་བརྩི་བའི་རྣམ་པ་གསལ་པོ་ཞིག་རེད་ཅེས་བརྗོད་འདུག་པ་མ་ཟད། བྲོལ་བྱོལ་དུ་ཡོང་བའི་བོད་རིགས་དང་ཡུ་གུར་བ། དེ་བཞིན་ཧོང་ཀོང་མང་གཙོ་དོན་གཉེར་བ་སོགས་ལ་མཚོན་ན་ད་རེས་ཀྱི་ཆོག་མཆན་དེ་ནི་འཛིན་སྐྱོང་གི་འགྱུར་བ་ཙམ་མ་ཡིན་པར། ཁོང་ཚོའི་ནང་སེམས་ལ་འཇིགས་སྣང་གི་བྱུང་ཁུངས་ཤིག་སྐྲུན་པ་རེད་ཅེས་བརྗོད་འདུག མ་ཟད་ཁོང་གིས་ཨིན་ཡུལ་གྱི་མི་ཟེར་ཡིན་པ་ཧོང་ཀོང་མང་གཙོ་དོན་གཉེར་བ་དང་ Apple Daily གསར་ཁང་གི་ཚོང་བདག་ Jimmy Lai ཇི་མི་ལའེ་དུས་ད་ལྟའང་རྒྱ་གཞུང་གིས་མ་ཉེས་ཁ་གཡོགས་ཐོག་ནས་བཙོན་འཇུག་ཁྲིམས་ཐག་བཅད་ཡོད་པ་ལུང་འདྲེན་དང་། ཨིན་གཞུང་གིས་གནད་དོན་དེའི་ཐོག་རྒྱ་གཞུང་ལ་འདྲི་རྩད་གཏོང་རྒྱུ་ལས་ལྡོག་སྟེ། གཞུང་ཚབ་ཆེན་མོ་གསར་རྒྱག་བྱ་རྒྱུ་དེར་བཀའ་ཁྲོལ་གནང་བ་ནི་འགྲོ་བ་མིའི་ཐོབ་ཐང་དང་རྒྱལ་ཁབ་ཀྱི་རྩ་ཆེན་རིན་ཐང་ལ་རྡོག་རོལ་གཏོང་བ་མཚོན་གྱི་ཡོད་པའི་སྐྱོན་བརྗོད་བྱས་འདུག གཞན་ཡང་ The Committee […]

The post རྒྱ་ནག་གཞུང་ཚབ་གསར་རྒྱག་ལ་ཆོག་མཆན་སྤྲད་པར་མང་ཚོགས་ནས་ངོ་རྒོལ། appeared first on vot.